Shënimi i 80-vjetorit të Masakrës së Tivarit
Në organizim të përbashkët të Këshillit Kombëtar të Shqiptarëve dhe Këshillit Kombëtar të Boshnjakëve në Malin e Zi, u shënua sot 80-vjetori i ngjarjes tragjike të Masakrës së Tivarit, ku mijëra qytetarë shqiptar të Kosovës dhe një numër i caktuar me kombësi boshnjake, janë vrarë në fillim të prillit të vitit 1945 në Tivar.
Pasi që këtë vit mbushen plot 80 vite nga kjo ngjarje tragjike, e kemi konsideruar si obligim moral dhe përgjegjësi kombëtare që në mënyrë dinjitoze të shënojmë këtë përvjetor dhe të nderojmë të rinjët e pafajshëm që humbën jetën në atë masakër dhe në këtë mënyrë të nderpresim heshtjen që ka mbizotëruar për dekada.
Këtë ngjarje e shënuam duke vendosur kurora me lule te vendi i ngjarës dhe kemi mbajtur një minut heshtje në nderim të viktimave të pafajshme, pastaj me një fjalë rastit për ngjarjen, të pranishmëve dhe përfaqësuesve të medias i është drejtuar kryetari i Këshillit Kombëtar të Shqiptarëve z.Faik Nika dhe kryetari i Këshillit Kombëtar të Boshnjakëve z.Sulo Mustafiq.
Poashtu në këtë aktivitet morën pjesë edhe Ambasadorja e Republikës së Kosovës në Mal të Zi, SH.S.Znj. Ariana Zherka Hoxha, kryetari i Komunës së Ulqinit z. Genci Nimanbegu, deputeti në Parlamentin e Malit të Zi z. Ilir Çapuni, disa nga pasardhësit e familjeve të viktimave, disa nga anetarët e Këshillit Kombëtar të Shqiptarëve dhe Këshillit Kombëtar të Boshnjakëve si: Tahir Tahir, Ali Gjeçbritaj, Ismet Kallaba, Lavdim Kroma, Mirsad Rastoder si dhe dy aktivistet e mirënjohura nga qyteti i Ulqinit znj. Hatixhe Gjoni dhe dr. Zylfije Gjoni Duraku poashtu edhe disa qytetarë nga Komuna e Tivarit.
Këshilli Kombëtar i Shqiptarëve me 30 dhe 31 mars 2013 ka organizuar Konferencen shkencore kushtuar Masakrës së Tivarit -“Masakra e Tivarit 1945” ku kanë marrë pjesë studiues e shkencëtar nga Shqipëria, Kosova, Mali i Zi e Maqedonia. Me këtë rast me 31.mars.2013 anëtar të KKSh në MZ, bashkë me pjesëmarrësit e Konferencës vizituan vendin ku u masakruan mijëra të rinjë kosovar të pafajshëm – në ndërtesën e ish Monopolit të duhanit në Tivar, me ç’rast për herë të parë në mënyrë të organizuar në shenjë nderimi për viktimat e tragjedisë së Tivarit u vendos kurorë lulesh.
