Takim me ministren Besa Shahini pranë Ministrisë së Arsimit, Sportit dhe Rinisë në Tiranë
Përfaqësuesit e Këshillit Kombëtar të Shqiptarëve në Mal të Zi, zhvilluan një takim pune në Tiranë, në Ministrinë e Arsimit, Sportit dhe Rinisë të Republikës së Shqipërisë, në të cilin janë mirëpritur nga ministrja znj. Besa Shahini me bashkëpunëtorët e saj.
Kryetari i Këshillit Kombëtar, z. Faik Nika së bashku me disa nga anëtarët e Komisionit për Arsim, diskutuan për çështjet që kanë të bëjnë me arsimin shqip në Mal të Zi.
Në mes të tjerash trajtuan këto tema:
- shpërndarja e kuotave në universitetet publike për studentët shqiptarë nga Mali i Zi;
- thjeshtëzimi i procedurave për aplikim në universitete për kandidatët nga trojet si: vula apostile, procedura e njësimit të diplomave të shkollës së mesme etj.;
- çështja e pajisjes me leje qëndrimi për studentët nga Mali i Zi;
- nevoja për kuota të veçanta për studime të thelluara në institucionet publike (master, doktoraturë, specializime në lëminë e mjekësisë);
- përshpejtimi i procedurave për nostrifikimin e diplomave të atyre që diplomohen në universitetet e Shqipërisë;
- shqyrtimi i mundësisë për asistencë me mjete mësimore e didaktike, lektyra shkollore, harta gjeografike në gjuhën shqipe etj.
Në takim gjithashtu u theksua bashkëpunimi i shkelqyer i Këshillit Kombëtar me Ambasadën e Republikës së Shqipërisë në Podgoricë, të cilët i falenderojmë për angazhimin e tyre në organizimin e këtij takimi.
