Mesazh urimi për kryeministrin e Shqipërisë
Kryetari i Këshillit Kombëtar të Shqiptarëve në Mal të Zi, i është drejtuar Kryeministrit të Republikës së Shqipërisë z. Edi Ramës me mesazhin e urimit për korrjen e fitores në zgjedhjet parlamentare të 25 prillit, duke i dëshiruar suksese në punë dhe duke përcjellë gatishmërinë që të vazhdojnë bashkëpunimin institucional, vëllazëror e shoqëror, në dobi të çështjeve kombëtare.
Në vazhdim mund të lexoni shkresën e plotë të kryetarit Faik Nika dërguar Kryeministrit Rama:
“I dashur Kryeministër z. Rama,
Me anë të kësaj letre, në emër të Këshillit Kombëtar të Shqiptarëve në Malin e Zi dhe në emrin tim personal, Ju përcjellim urimet tona të sinqerta për fitoren në zgjedhjet parlamentare të 25 prillit 2021. Besojmë fort se do të vazhdoni të bëni më të mirën për Shqipërinë dhe shqipëtarët në përgjithësi!
Shqiptarët në Malin e Zi, përherë e kanë vemendjen tek ngjarjet, proceset e zhvillimet që ndodhin në Shqipëri, në shtetin amë, të bindur se kur Shqipëria është mirë dhe në rrugën e duhur, shqiptarët në përgjithsi ndihen më mirë e më të sigurt. Më duhet të rikujtoj dhe njëkohësisht t’ju falënderoj, sepse gjatë mandatit Tuaj si Kryeministër i Republikës së Shqipërisë, për herë të parë në histori, keni marrë vendim për të ndihmuar edhe financiarisht, institucionet e shqiptarëve në trojet e veta jashtë Shqipërisë.
Me bindje dhe vullnet të plotë se edhe gjatë mandatit të ri qeverisës do të vazhdojmë edhe më shumë, edhe më mirë bashkëpunimin tonë institucional, vëllazëror e shoqëror, në dobi të çështjeve kombëtare. Më mbetet vetëm t’Ju dëshiroj suksese në ambiciet Tuaja për një Shqipëri të zhvilluar dhe evropiane për çka do të ndiheshin krenarë mbarë shqiptarët. Urime!
Sinqerisht,
K r y e t a r i
Faik Nika“
